د اوبو سرچینو د څارنې، څېړنې او مطالعاتو وسایلو د چمتوکولو په برخه کې د اوبو او انرژي له وزارت سره د یونیسیف محترمې موسسې مالي همکاري
د اوبو او انرژي وزارت د اوبو سرچینو عمومي ریاست د سطحي او ځمکې لاندې اوبو سرچینو د ریاستونو لپاره یو پروپوزل د (800000) اته سوه زره آمریکایي ډالرو په ارزښت د هایدرولوجیکي، هایدرومتیورولوجیکي او هایدروجیولوجیکي څېړنو او مطالعاتو د تخنیکي وسایلو د چمتوکولو او پېر لپاره چمتو کړی وو، چې تر اوسه پورې له وړاندیز شوو توکو څخه نوموړې موسسې د کابو څلور سوه زره آمریکایي ډالرو په ارزښت تخنیکي وسایل پېرلې او دغه وزارت ته یې سپارلې دي.
د دغو وسایلو دريېمه جوپه چې پکې د جیوفزیکي څېړنو څلور دستګاوي شاملې دي، د ۱۲۲ زره یورو په ارزښت د یونیسیف محترمې موسسې له لورې پېرل شوې او د ځمکې لاندې اوبو ریاست ته سپارل شوې، ترڅو د ځمکې د پوړونو د جوړښت او د ځمکې لاندې اوبو د مطالعاتو په موخه ګټه ورڅخه واخیستل شي.
د اوبو او انرژي وزارت د اوبو معین محترم مجیب الرحمن عمر آخندزاده د یونیسیف محترمې موسسې څخه د مننې ترڅنګ د دغو پېرل شوو وسایلو ارزښت ته په اشارې سره د اوبو مطالعاتو د څېړنو په برخه کې ورڅخه په اغېزمنې ګټې اخیستنې باندې ټینګار وکړ.
همدارنګه د ځمکې لاندې اوبو رئيس محترم انجنیر عزیز الرحمن عزیز د نوموړو وسایلو د کارونې په هکله معلومات وړاندې کړل او د یونیسیف محترمې موسسې څخه د مننې ترڅنګ د دغو وسایلو شتون د ځمکې لاندې اوبو د څېړنو او مطالعاتو په برخه کې ارزښتناک وبلل.
د یادونې وړ ده، چې پاتې نور تخنیکي تجهیزات په تدارکاتي پړاوونو کې دي او په نږدې راتلونکي کې به د نوموړې موسسې له لوري چمتو شي.
