د اوبو او انرژي وزارت سرپرست وزیر د لاندني هلمند سیندیزې فرعي حوزې(زرنج) له رئيس سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د خپل کار په دفتر کې د لاندني هلمند سیندیزې فرعي حوزې له رئيس ښاغلي مولوي سید محمد ولي آغا سره وکتل.
په یاده لیدنه کې، د یادې حوزې رئيس د اوبو او انرژي وزارت سرپرست وزیر ته د کمال خان بند د چارو د پرمختګ په هکله بشپړ معلومات وړاندې کړل او د وزارت له رهبري څخه یې د لشکري کانال د لایروبي د چارو د پيل او د یاد ریاست ماشینري د ترمیم غوښتنه وکړه.
په ورته مهال، د اوبو او انرژي وزارت سرپرست وزیر په دې لیدنه کې د کمال خان بند د چارو پر چټکتیا باندې ټینګار وکړ او د لاندني هلمند سیندیزې فرعي حوزې له رئيس سره یې د لشکري کانال د لایروبي چارو د پیل او د یاد ریاست د ماشینري د ترمیم په هکله د وزارت د شته امکاناتو او بودجې په پام کې نیولو سره د همکاري ژمنه وکړه.
