د اوبو او انرژي وزارت د کارمندانو لپاره د اجراآتو د ارزونې ورکشاپ د دې وزارت د غونډو په تالار کې ترسره شو
یاد ورکشاپ د وزارت د جومات د ملا امام ښاغلي مولوي سید هارون له خوا د قرآن کریم د آیاتونو په تلاوت سره پیل شو او وروسته د اوبو اوانرژي وزارت د اطلاعاتو او نشراتو رئيس ښاغلي الحاج غلام جیلاني حق پرست چې د یاد ورکشاپ د پرمخ وړلو مسؤلیت په غاړه درلود، د چارو ادارې میلمنو او ټولو ګډونوالو ته ښه راغلاست وویل او د دې ورکشاپ ترسره کول یې د کارمندانو د کړنو د اجراآتو د ارزونې او د چارو د غوره پرمخ وړلو په برخه کې ګټور او ارزښتناک و باله.
د ورکشاپ په دوام کې، د وزارت مقام د دفتر عمومي رئيس ښاغلي قاري محمد عبدالعزیز عزیز د اجراآتو د ارزونې د ارزښت په هکله خبرې وکړې او ټینګار یې وکړ: " لکه څنګه چې پرله پسي کلونه مو په ټینګ هوډ سره د اشغالګرانو په وړاندې مبارزه وکړه اوس هغه وخت را رسېدلی چې د افغانستان د خلکو لپاره د رښتینې خدمت رسونې په ترسره کولو کې د دې سپیڅلي جهاد ارزښتونه وساتو. "
همدارنګه د اوبو او انرژي وزارت مالي او اداري عمومي رئيس ښاغلي الحاج محمدالدین نیازي د چارو د ادارې د پلاوي له زحمتونو څخه چې د اجراآتو د اروزنې ورکشاپ د جوړولو په موخه دې وزارت ته راغلي، هرکلی وکړ او د دې وزارت له ټولو کارمندانو څخه یې و غوښتل چې د خپلو مسؤلیتونو په ترسره کولو سره په رښتینې توګه د هېواد د هوساینې په برخه کې هڅه وکړي.
په ورته مهال، د ملکي خدمتونو د حقوقي او تګلارو چارو رئيس ښاغلي سید مسعود مخلص د اجراآتو د ارزونې د څرنګوالي په هکله خبرې وکړې او دغه اروزنه یې د چارو د غوره پرمخ وړلو لپاره ارښتناکه وبلله. ښاغلي مخلص د دې ورکشاپ لپاره د زمینې د برابرولو په پار د اوبو او انرژي وزارت له همکاریو څخه مننه وکړه.
په پای کې د چارو ادارې او د اوبو او انرژي وزارت کارپوهانو د یوه بشپړ پرزنټیشن په وړاندې کولو سره د اوبو او انرژي وزارت له کارمندانو سره د اجراآتو د ارزونې د پروسې په هکله اړین معلومات شریک کړل.
