د اوبو او انرژي وزارت د رهبري مقاماتو د ۷۷ ترکي شرکت له رئيس ښاغلي سلیمان جیلیو سره په لیدنه کې د کجکي بند د چارو پرمختګ د و ضعیت او د هرات د بادي برېښنا د تولید د پروژې په هکله بحث او د اندونو تبادله وکړه
د اوبو او انرژي سرپرست وزیر محترم الحاج ملا عبداللطیف منصور او د دغه وزارت د اوبو معین محترم مجیب الرحمن عمر آخندزاده په خپلو کاري دفترونو کې د ۷۷ ترکي شرکت له رئيس محترم سلیمان جیلیو سره لیدنه وکړه.
په دغو لیدنو کې د نوموړي شرکت رئيس د کجکي بند د دوهم فاز د پرمختګ د وضعیت په هکله راپور ورکړ او ویې ویل، چې اوسمهال د کېندنې او دروازه بندۍ چارې په ښه توګه روانې دي. هغه زیاته کړه، چې په پام کې لري، ترڅو د وزارت د رهبري مقام په هوکړې سره په هرات کې د ۲۰۰ میګاواټه بادي برېښنا په پروژه کې خپله پانګونه پيل کړي.
په ورته مهال، د اوبو او انرژي وزارت د رهبري مقاماتو د د اوبو او انرژي د پروژو د پلي کولو په برخه کې د نوموړي شرکت د کړنو په ستایلو سره د کجکي بند د دوهم فاز د چارو پر چټکتیا باندې ټینګار وکړ.
په ورته مهال، د اوبو او نرژي سرپرست وزیر وویل، هڅه کېږي چې د هرات ولایت د ۲۰۰ میګاواټه بادي برېښنا په پروژه کې د پانګونې په موخه کې د زمینې د چمتو کولو لپاره اړینې ارزونې ترسره شي او په راتلونکي کې ډېر ژر د پروژې قرارداد د دواړو لورو ترمنځ لاسلیک شي.
