د اوبو او انرژي وزارت د رهبري او د لوګر ولایت د مس عینک کان د قراردادي شرکت د مسؤلینو ترمنځ د نوموړي کان د برېښنا د برابرولو په موخه د همغږۍ ناسته ترسره شوه
د اوبو او انرژي سرپرست وزیر محترم الحاج ملا عبداللطیف منصور او د دغه وزارت د انرژي معین محترم مولوي حمدالله زاهد د لوګر ولایت د مس عینک کان د را ایستلو پروژې د برېښنا د برابرولو موضوع په هکله د نوموړي کان د قراردادي شرکت( ام، سې، سې) له مسؤلینو سره خبرې وکړې.
د اوبو او انرژي سرپرست وزیر په دغه ناسته کې د کاپيسا ولایت د باغدرې برېښنا تولید پروژه او سروبي ۲ برېښنا بند نوموړي شرکت ته د پانګونې لپاره وړاندیز کړل، ترڅو له یوې خوا د اړتیا وړ برېښنا چمتو شي او له بلې خوا د افغانستان خلک هم د دغو پروژو له پلي کولو څخه ګټه پورته کړي.
همدارنګه ښاغلي منصور په دغه ناسته کې، د دغو پروژو د ګټو او ارزښتونو یادونه وکړه او د همغږي او عملي چارو پر چټکتیا باندې د ټینګار ترڅنګ هغوی ته ډاډ ورکړ، چې د دغه وزارت تخنیکي ټیم چمتو دی چې د نوموړي شرکت له مسؤلینو سره د اړتیا وړ معلومات شریک کړي.
په ورته مهال، د مس عینک کان د قراردادي شرکت مسؤلینو هم د اوبو او انرژي وزارت رهبري ته ډاډ ورکړ، چې د چارو چټکتیا ته ژمن دي او ژر تر ژره به د وروستيو هوکړو په موخه اړینې څېړنې پیل کړي.
