د اوبو او انرژي وزارت د تخنیکي مسؤولینو او د تاتارستان هېواد د تخنیکي پلاوي تر منځ د اوبو او انرژي په پروژو کې د ګډو همکاریو د برابرولو په موخه تخنیکي ناسته ترسره شوه
دغهٔ لیدنهٔ نن ( د ۱۴۰۴ لمریز کال د زمري د میاشتې په ۱۵مه) د افغانستان اسلامي امارت د اوبو او انرژي وزارت د انرژي معین محترم الحاج ملا عبدالهادي یعقوب او د تاتارستان هېواد د صنعت او تجارت وزارت معین ښاغلي مینیبیف مراد فیض رخمانوویچ او د دواړو لورو د یو شمېر تخنیکي مسؤولینو په شتون کې د دغه وزارت د انرژي معینیت د غونډو په تالار کې ترسره شوه.
د غونډې په دوام کې دواړو خواوو د اوبو او انرژي په پروژو کې د همکاریو د پیل د څرنګوالي، د پروژو د اطلاعاتو تبادلې او د اړینو همغږیو د رامنځته کولو په تړاو بحث او د اندونو تبادله وکړه.
دواړو خواوو د دغو همکاریو ترسره کول په افغانستان کې د بهرنیو پانګونو د پراختیا لپاره او د اوبو او انرژي پراختیايي پروژو د پلي کولو لپاره آړین وبلل او ژمنه یې وکړه چې د دغې مشترکې موخې د رښتیا کولو لپاره به خپلې ټولې هڅې په کار واچوي.
د یادونې وړ ده چې دغهٔ لیدنهٔ د افغانستان د اوبو او انرژي وزارت د سرپرست او د تاتارستان د صدراعظم د مرستیال د پرونۍ لیدنې وروسته ترسره شوه چې په هغې کې د تاتارستان له لوري په افغانستان کې د اوبو او انرژي په پروژو کې د پانګونې لپاره جدي لېوالتیا اعلان شوې وه.
