د اوبو او انرژي وزارت د اوبو معین د یوه اوکرایني شرکت له متخصصینو سره په لېدنه کې د اوبو او انرژي په پروژو کې د ګډې همکاري د ترسره کولو په هکله بحث او د اندونو تبادله وکړه
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې د یوه اوکرایني شرکت له یو شمېر متخصصینو سره لیدنه وکړه.
په دغه لیدنه کې، او کرایني متخصصینو په افغانستان کې د اوبو او انرژي د پراختیایي پروژوه د پلي کولو په برخه کې د همکاري لېوالیتا څرګنده کړه او همدارنګه یې وویل، چمتو دي چې د ښوونیزو برنامو د پلي کولو په برخه کې د افغاني انجنیرانو د تخنیکي وړتیا لوړونې لپاره هم همکاري وکړي.
په ورته مهال، د اوبو او انرژي وزارت د اوبو معین د دغه وزارت له لوري د هر اړخیزې همکاري په برخه کې ډاډ ورکړ او یادونه یې وکړه، چې اوسمهال په افغانستان کې د پروژو د پلي کولو لپاره په بشپړه توګه زمینه چمتو ده او دغه هېواد د انرژي د تولید لپاره د اوبو د کافي سرچینو درلودونکی هم دی.
په پای کې هوکړه وشوه، چې د لا زیاتې همغږۍ او د ګډو همکاریو لپاره د زمینې د چمتو کمولو په موخه په نږدې راتلونکې کې د دواړو لورو ترمنځ هوکړه لیک لاسلیک شي؛ چې له هغه سره سم نور اقدامات وشي.
