د اوبو او انرژي وزارت د اوبو معین د ملګرو ملتونو سازمان د خوړو او کرهڼې له استازي سره وکتل
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې په افغانستان کې د ملګرو ملتونو سازمان دخوړو او کرهڼې (FAO) له استازي ښاغلي ریچارد "ترینچارد" سره وکتل.
په دې لیدنه کې، د اوبو د مدیریت د پروژو د پلې کولو، په هېواد کې د اوبو لګولو او اوبو رسولو په برخه کې د همغږیو او ګډو همکاریو او نورو دوه اړخیزو همکاریو په هکله په بشپړ ډول بحث او د اندونو تبادله وشوه.
د اوبو ښاغلي معین په یاده لیدنه کې، د لا زیاتو همغږیو په رامنځته کولو او د همکاریو په پراختیا باندې ټینګار وکړ او وړاندیز یې وکړ، چې د چارو د انسجام او د دوو اړخیزو همکاریو د لا ښه پلې کولو په موخه اړینه ده چې د دواړو لورو ترمنځ د همکاري هوکړه لیک لاسلیک شي.
په ورته مهال، په افغانستان کې د ملګرو ملتونو د خوړو او کرهڼې (FAO) استازي د اوبو او انرژي وزارت سره د ګډو همکاریو د لېوالتیا په څرګندولو سره وویل، چې نوموړی سازمان هم له دې وزارت سره د کاري اړیکو د ټینګولو او د همکاري د پراختیا غوښتونکی دی.
په پای کې دواړو لورو د لا زیاتو همغږیو په رامنځته کولو او د اوبېزو سرچینو د مدیریت لپاره د دوو اړخیزو همکاریو د پلې کولو په موخه د چمتو کوونکو چارو په برابرولو باندې ټینګار وکړ.
