د اوبو او انرژي وزارت، د نړیوال سازمان د بشردوستانه چارو د همغږي دفتر او د کرنې، اوبولګولو او مالداري وزارت ترمنځ د همغږۍ ناسته ترسره شوه

دغه ناسته د اوبو او انرژي وزارت د اوبو معین محترم مجیب الرحمن عمر آخندزاده، د نړیوال سازمان د بشر دوستانه چارو د همغږي دفتر د مسؤلینو او د کرنې، اوبولګولو او مالداري وزارت د استازو په شتون کې ترسره شوه.

په دغه ناسته کې، د بشري مرستو په همغږي کولو او د اوبو سرچینو په برخه کې د دوه اړخیزو همکاريو په ترسره کولو په ځانګړې توګه د اقلیم له بدلون سره د سازګاري په هکله بحث او د اندونو تبادله وشوه.

د اوبو محترم معین په دغه ناسته کې له اقلیمي بدلونونو سره د سازګاري په برخه کې دوه اړخیزو همکاریو ارزښت ته په اشارې سره ټینګار وکړ، چې مؤقتي او لنډ مهاله برنامې په دې برخه کې نشي کولای د اقلیمي بدلونونو له امله رامنځته شوې ستونزې هوارې کړي، له همدې کبله اړتیا ده چې په دې برخه کې په بنسټیز او اساسي ډول کار وشي، ترڅو د اقلیم له کبله رامنځته شوې ننګونې لکه وچکالي، ناڅاپه سیلابونه او نورو ګواښوونو ته چې د افغانستان خلکو ته متوجه دي، رسیدګي وشي.

په پای کې د ناستې اړخونو یوبل ته د همکاري ډاډ ورکړ او د دوه اړخیزو همکاریو پر چټکتیا باندې یې ټینګار وکړ.