د اوبو او انرژي سرپرست وزیر پکتیا ولایت کې د اسلامي نظام د یووالي او استحکام تر نامه لاندې ولسي غونډه کې ګډون وکړ
د اوبو او انرژي سرپرست وزیر محترم الحاج ملا عبداللطیف منصور د اسلامي نظام د یووالي او استحکام تر نامه لاندې په یوه ستره ولسي غونډه کې په داسي حال کې ګډون وکړ، چې پکې یو شمیر نورو سرپرستو وزیرانو، د پکتیا ولایتي مسئولینو او د پکتیا، پکتیکا، خوست، لوګر او غزني ولایتونو قومي مخورو، علماوو او عامو ولسونو هم ګډون کړی وو.
په دغه ستره ولسي غونډه کې د اوبو او انرژي سرپرست وزیر د هېواد د قومونو او قبایلو د یووالي او پیوستون د ستایلو او اسلامي نظام له استحکام سره د ولسونو د مرستې اړتیا ترڅنګ وویل، چې اوسنی نظام مسئول دی، چې هېوادوالو ته د ژوند ټولې اسانتیاوي برابري کړي.
همدارنګه، د پکتیا مرستیال والي محترم مولوي انعام الله صلاح الدین د اسلامي نظام په رامنځته کېدو کې د قومونو قربانۍ وستایلې او د هغوی پر یووالي باندې یې ټینګار وکړ.
په ورته مهال، د یادو ولایتونو قومي مخورو هم د اوسني نظام څخه خپل ملاتړ څرګند کړ.
