د اوبو او انرژي سرپرست وزیر د قطر، ترکیې او یو شمېر آفریقایي هېوادونو له پانګوالو سره په افغانستان کې د برېښنا انرژي تولید په پروژو کې د پانګونې په هکله خبرې، اترې وکړې
د اوبو او انرژي سرپرست وزیر محترم الحاج ملا عبداللطیف منصور نن له غرمې وروسته د خپل کار په دفتر کې د قطر، ترکیې او یو شمېر آفریقایي هېوادونو د پانګوالو له رئيس محترم دوکتور حیات الله عتید او مل پلاوي سره وکتل او په افغانستان له بېلابېلو سرچینو څخه د برېښناانرژي تولید په پروژو کې د پانګونې په هکله بحث او د اندونو تبادله وکړه.
په دغه ناسته کې، د اوبو او انرژي سرپرست وزیر نوموړو پانګوالو ته د ښه راغلاست ترڅنګ، په افغانستان کې د برېښنا انرژي تولید سرچینو په هکله اړین معلومات وړاندې کړل، او زیاته یې کړه، چې اوسمهال په افغانستان کې امنیت ټینګ دی، او د برېښنا انرژي تولید په پروژو کې پانګونې ته زمینه له هره پلوه چمتو شوې ده.
د اوبو او انرژي سرپرست وزیر د نوموړو هېوادونو له پانګوالو سره په لیدنه کې ټینګار وکړ، چې مونږ د ټولو بهرنیو هېوادونو پانګوالو په ځانګړې توګه د اسلامي هېوادونو پانګوالو ته د برېښنا انرژي تولید په پروژو کې د پانګونې په برخه کې همکاري ته چمتو یو.
دغه ناسته د وزارت او نوموړو پانګوالو د تخنیکي ټیمونو ترمنځ د همغږي ناستو په ترسره کولو باندې د برېښنا انرژي تولید پروژو په برخه کې د پانګونې لپاره عملي اقداماتو ته د زمینې په چمتوکولو باندې په ټینګار سره پای ته ورسېده.
