د اوبو او انرژي سرپرست وزیر د فراه ولایت د بخش آباد بند د انحرافي تونلونو پروژې له قراردادي مسؤل سره وکتل
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د دغه وزارت د یو شمېر رئيسانو او تخنیکي مسؤلینو په شتون کې د بخش آباد بند د انحرافي تونلونو پروژې له قراردادي مسؤل محترم جمشید شاهي او ورسره مل تخنیکي ټیم سره وکتل او د نوموړې پروژې د چارو د پرمخ وړلو په هکله خبرې، اترې وکړې.
په دغه لیدنه کې، د اوبو او انرژي سرپرست وزیر د نوموړې پروژې د چارو پرچټکتیا باندټینګار وکړ او د قراردادي شرکت مسؤلینو ته د هر ډول همکاري ډاډ ورکړ او زیاته یې کړه، چې اوس تر بل هر وخت په افغانستان کې د پراختیایي پروژو د پلي کولو لپاره ښه زمینه چمتو شوې ده او مونږ په دې برخه کې هر ډول همکاري ته چمتو یو.
د اوبو او انرژي سرپرست وزیر په دغه لیدنه کې د بخش آباد بند د انحرافي تونلونو قراردادي مسؤل او تخنیکي ټیم ته لارښوونه وکړه، چې د وزارت له تخنیکي ټیم سره په ګډه او بشپړه همغږي سره د دغې پروژې چارې پرمخ یوسي.
په ورته مهال، د نوموړې پروژې قراردادي مسؤل او تخنیکي ټیم د اوبو او انرژي سرپرست وزیر ته د دغې پروژې د چارو دغوره پرمخ وړلو او د وزارت له تخنیکي ټیم سره د چارو په پرمخ وړلو کې د بشپړې همکاري او همغږي په موخه ډاډ څرګند کړ.
د یادونې وړ ده، چې د بخش آباد بند پروژه په فراه ولایت کې د اوبو او انرژي وزارت له مهمو پروژو څخه ده، چې د چارو په بشپړېدو سره به یې د اوبو لګولو په برخه کې د دغه ولایت د خلکو ډیرې ستونزې هوارې شي.
