د اوبو او انرژي سرپرست وزیر د شمال سیندیزې عمومي حوزې او د بلخ له فرعي سیندیزې حوزې څخه لیدنه وکړه
د اوبو او انرژي سرپرست وزیر محترم الحاج ملا عبداللطیف منصور د شمال سیندیزې عمومي حوزې او د بلخ له سیندیزې فرعي حوزې څخه ليدنه وکړه او د نوموړو حوزو له رئيسانو، کارمندانو او د بلخ ولایت له یو شمېر قومي مشرانو سره یې وکتل.
په دغه لیدنه کې، د شمال سیندیزې حوزې عمومي رئيس محترم انجنیر رفیع الله مجتبی ، د بلخ سیندیزې فرعي حوزې رئيس محترم مولوي موسی جان حقبین او د بلخ ولایت یو شمېر قومي مشرانو په دې ولایت کې د اوبو او برېښنا انرژي د پروژو د پلي کولو غوښتنه وکړه او په دې برخه کې یې خپلې شته ستونزې او وړاندیزونه د اوبو او انرژي له سرپرست وزیر سره شریک کړل.
په ورته مهال، د اوبو او انرژي سرپرست وزیر په دغه لیدنه کې د نوموړو حوزو رئيسانو او دغه ولایت قومي مشرانو ته ډاډ ورکړ چې د شته امکاناتو په پام کې نیولو سره به د دوی ستونزو ته رسیدګي وشي او اړوندو مسؤلینو ته یې په دې هکله اړین هدایات ورکړل.
