د اوبو او انرژي سرپرست وزیر د خوست ولایت د نیازیو مظهر العلوم مدرسې د علماوو په فراغت غونډه کې ګډون وکړ
د اوبو او انرژي سرپرست وزیر محترم الحاج ملا عبداللطیف منصور د خوست ولایت د نیازیو مظهرالعلوم مدرسې د علماوو په فراغټ غونډه په داسې حال کې چې د ریاست الوزرا اقتصادي مرستیال محترم الحاج ملا عبدالغني برادر آخند، د پوهنې سرپرست وزیر محترم مولوي حبیب الله آغا، د کورنیو چارو وزارت معین محترم مولوي محمد نبي عمري، د افغاني سرې میاشتې لوی رئيس محترم شیخ صاحب شهاب الدین دلاور او یو شمېر نورو مسؤلینو ګډون در لود د دیني علومو د زده کړې او د علماوو د مسؤلیتونو په هکله خبرې وکړې.
د اوبو او انرژي سرپرست وزیر د نوموړې مدرسې د علماوو په فراغت غونډه کې له علماوو کرامو څخه وغوښتل چې خپل مسؤلیتونه په ښه توګه ترسره او د اسلامي نظام د ټینګښت او د شریعت احکامو د پلي کېدو په برخه کې له اسلامي امارت سره همکاري وکړي.
همدارنګه، د اوبو او انرژي سرپرست په دغه فراغت غونډه کې د مدرسو له استادانو څخه وغوښتل چې علما په فکري، اسلامي او هېوادنۍ روحیه وروزي، ترڅو هېواد او هېوادوالو ته د ښیګڼې مصدر وګرځي.
