د اوبو او انرژي سرپرست وزیر د ترکیې هېواد د سفیر له سلاکار او د ۷۷ ترکي ودانیز شرکت له مرستیال سره وکتل
د اوبو او انرژي سرپرست وزیر محترم ملا عبداللطیف منصور د خپل کار په دفتر کې د ترکیې هېواد د سفیر له سلاکار محترم جانګیز آی دمیر او د ۷۷ ترکي ودانیز شرکت له مرستیال محترم بوراک اونسال سره وکتل او د اوبو او انرژي پروژو د پلي کولو په برخه کې یې بحث او د اندونو تبادله وکړه.
په دغه کتنه کې، د اوبو او انرژي سرپرست وزیر د نوموړي شرکت له مرستیال څخه و غوښتل چې په هرات ولایت کې د ۲۰۰ میګاواټه بادي برېښنا او د سروبې دوهم بند د پروژو عملي چارې ډېر ژر پیل کړي.
په ورته مهال، د یاد شرکت مرستیال په دغه لیدنه کې د اوبو او انرژي وزارت د رهبري مقام له همکاري څخه د مننې ترڅنګ، وویل چې ډېر ژر به په هرات ولایت کې د ۲۰۰ میګاواټه بادي برېښنا پروژې عملي چارې پيل کړي.
د یادونې وړ ده، چې څه موده وړاندې د اوبو او انرژي وزارت سرپرست وزیر د ۷۷ ترکي ودانیز شرکت له رئيس سره د هرات ولایت په کشک او ګذرې ولسوالیو کې د ۲۰۰ میګاواټه بادي برېښنا د تولید په پروژه کې د پانګونې او د سروبې دوهم بند د جوړلو لپاره د همکاري هوکړه لیک لاسلیک کړ او ټاکل شوې ده چې په نږدې راتلونکي کې به یې عملي چارې پیل شي.
