د انرژي معین د پکتیکا ولایت د مشرانو له یوې ډلې سره په هغه ولایت کې د اوبو او انرژي پروژو په هکله بحث او د اندونو تبادله وکړه
د اوبو او انرژي وزارت د انرژي معین محترم الحاج ملا عبدالهادي یعقوب او د دغه معینیت یو شمېر رئيسانو د پکتیکا ولایت د مشرانو له یوې ډلې سره د دغه معینیت د غونډو په تالار کې وکتل.
په دغه لیدنه کې، د پکتیکا ولایت مشرانو خپلې ستونزې او وړاندیزونه د انرژي له معین سره شریک کړل او په هغه ولایت کې یې د اوبو او انرژي پراختیایي پروژو په ځانګړې توګه د اوبو او برېښنا تولید بندونو جوړولو او برېښنا رسونې پروژو د پلي کولو په برخه کې د وزارت مقام د پاملرنې غوښتنه وکړه.
د انرژي محترم معین او د دغه معینیت یو شمېر رئيسانو د پکتیکا ولایت مشرانو ته ډاډ ورکړ، چې د لمریزې برېښنا، له غزني څخه پکتیکا ته د برېښنا لېږد او د هغه ولایت د برېښنا شبکې پراختیا پروژې د دغه وزارت په لومړیتوبونو کې دي، چې ان شاالله د امکاناتو په چمتو کېدو سره به یې چارې په راتلونکي وخت کې پیل شي.
