د انرژي معینیت په اداري او تخنیکي ناسته کې د دغه معینیت اړوند د یو شمېر موضوعاتو په هکله خبرې، اترې وشوې
دغه ناسته د اوبو او انرژي وزارت د انرژي معین محترم الحاج ملا عبدالهادي یعقوب تر رهبري لاندې د انرژي سکتور د رئيسانو، سلاکارانو او تخنیکي مسؤلینو په شتون کې د دغه معینیت د غونډو په تالار کې ترسره شوه او د انرژي سکتور اړوند د یو شمېر موضوعاتو په هکله بحث او د اندونو تبادله وشوه.
په دغه ناسته کې، د تېرې ناستې پریکړو ته د کتنې ترڅنګ، د باغدرې برېښنا بند د امکان سنجي مطالعاتو د قراردادي شرکت له لوري د وخت غځیدو د غوښتنې، د انرژي په سکتور کې له بهرنیو هېوادونو څخه د انرژي په برخه کې د راستانه شوو افغان متخصصینو د همکاري او د سروې او ډيزاین شوو پروژو د ټولنیزو ستونزو د هوارولو په هکله اړوندو رئيسانو او تخنیکي مسؤلینو خپل اندونه او وړاندیزونه وړاندې کړل.
د انرژي محترم معین د نوموړو موضوعاتو په هکله د رئيسانو، سلاکارانو او تخنیکي مسؤلینو د اندونو وړاندیزونو تر اورېدو وروسته، د چارو د چټکتیا او غوره پرمخ وړلو په موخه اړینې لارښوونې وکړې.
