د انرژي معینیت اونېزه تخنیکي او اداري ناسته ترسره شوه
دغه ناسته د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشري لاندې د دغه معینیت د رئيسانو، سلاکارانو او تخنیکي مسؤلینو په ګډون ترسره شوه.
په دغه ناسته کې، په تخنیکي او هر اړخیزه توګه د انرژي د نوي قرارداد شویو پروژو د غوره اجراآتو، مدیریت او پلي کولو په هکله بحث او د اندونو تبادله وشوه.
همدغه راز په دغه ناسته کې د انرژي معینیت لپاره تخنیکي بورډ تشکیل شو او پرېکړه وشوه، چې د انرژي معینیت له ټولو څانګو څخه دې یوه مشخصه کمېټه جوړه شي، تر څو د دغه تخنیکي بورډ کاري لایحه چمتو کړي.
د دفتر عمومي رئيس د موضوعاتو تر ارزونې او د رئيسانو د اندونو تر اورېدو وروسته اړینې سپارښتنې وکړې او پر همغږي، همکاري، د تخنیکي معلوماتو په شریکولو او په غور سره د چارو په ترسره کولو باندې يې ټینګار وکړ.
