د انرژي معینیت اونیزه تخنیکي او اداري ناسته ترسره شوه
دغه ناسته د دفتر عمومي رئيس او د انرژي معینیت د غونډو وارسي کوونکي محترم قاري محمد عبدالعزیز عزیز تر مشري لاندې د رئيسانو، سلاکارانو او د دغه معینیت د یو شمېر نورو تخنیکي مسؤلینو په ګډون ترسره شوه.
په دغه ناسته کې د دفتر عمومي رئيس او د انرژي معینیت د غونډو وارسي کوونکي د انرژي سکتور د مسئولیتونو ارزښت ته په اشارې سره د بشري سرچینو د ظرفیت لوړولو او د اړینو اصلاحاتو راوستلو په برخه کې ددغه معینیت کړنې وستایلې او ټینګار یې وکړ، چې هڅه کیږي ترڅو په راتلونکي کې د اړتیا وړ تجهیزات هم چمتو شي.
د غونډې په دوام کې د بېلابېلو اداري او تخنیکي موضوعاتو لکه د چارو د تنظیم او مدیریت، د هېواد د برېښنا شبکې د پراختیا استراتیژې او د نغلو ۱۰ میګاواټه لمریزې برېښنا پروژې د چارو پرمختګ د څرنګوالي په هکله بحث او د اندونو تبادله وشوه او اړینې پریکړې وشوې.
