د افغانستان اسلامي امارت د اوبو او انرژي وزیر د چین سفارت له کنسولر سره د دوه اړخیزو همکاریو په موخه لیدنه او د اندونو تبادله وکړه
د افغانستان اسلامي امارت د اوبو او انرژي وزیر محترم الحاج ملا عبداللطیف منصور نن، چهارشبنه، د ۱۴۰۴ هـ ل کال د وږي ۱۹، د دغه وزارت د غونډو په تالار کې د چین سفارت له کنسولر ښاغلي مه چین ګوانګ سان بوتونګ سره وکتل.
په دغه لیدنه کې، د همکاریو د پراختیا په ځانګړې توګه په بامیان، ارزګان او پکتیا ولایتونو کې د لمریزې برېښنا پروژو د پليکولو او په چین هېواد کې د وړتیا لوړولو برنامو کې د وزارت د انجنیرانو د ګډون په هکله بحث او د اندونو تبادله وشوه.
د اوبو او انرژي وزیر په دغه لیدنه کې، د چین د ام سي سي شرکت له لوري د باغدرې برېښنا بند د تخنیکي مطالعاتو پروژې د پرمختګ چارې مثبتې و ارزولې او په بامیان، ارزګان او پکتیا ولایتونو کې د برېښنا کموالي ستونزې ته په کتو سره، په دغو ولایتونو کې د لمریزې برېښنا پروژو چارو پر پيل باندې ټینګار وکړ.
په ورته مهال، د چین سفارت کنسولر د هېواد په ختیځو ولایتونو کې د وروستۍ زلزلۍ د راپېښېدو په مناسبت د خواخوږي څرګندولو ترڅنګ، د لمریزې برېښنا پروژو د پليکولو او همدارنګه د اوبو او انرژي وزارت د انجنیرانو د ښوونې په برخه کې د وزارت د رهبري مقام ته د همکاري ډاډ ورکړ.
دغه لیدنه د افغانستان او چین ترمنځ د اړیکو ټینګولو او د رغندو همکاریو پر دوام باندې په ټینګار سره پای ته ورسېده.
