د افغانستان اسلامي امارت د اوبو او انرژي وزیر د ټاپ نړیوالې پروژې له رئيس او د ترکمنستان هېواد له سفیر سره د ټاپ پروژې د بهیر د چټکتیا په هکله خبرې، اترې وکړې
د افغانستان اسلامي امارت د اوبو او انرژي وزیر محترم الحاج ملا عبداللطیف منصور، نن، سهشنبه(د ۱۴۰۴ هـ . ل کال د تلې ۱۵) د دغه وزارت د غونډو په تالار کې د ټاپ نړیوالې پروژې له رئيس ښاغلي مراد آرتیکوف او په کابل کې مېشت د ترکمنستان هېواد له سفیر ښاغلي خواجه عوضوف سره وکتل.
په دغه لیدنه کې، دواړو لورو د ټاپ برېښنا لېږد ( ترکمنستان – افغانستان – پاکستان) پروژې چارو د چټکتیا د بهیر په هکله بحث او د اندونو تبادله وکړه.
د افغانستان اسلامي امارت د اوبو او انرژي وزیر د سیمې د هېوادونو لپاره د دغې پروژې پر حیاتي ارزښت باندې د ټینګار ترڅنګ، روښانه کړه چې د افغانستان اسلامي امارت د دغې پروژې د چارو د چټکتیا په برخه کې هر راز همکاري او د پليکولو لپاره د زمینې چمتوکولو ته ژمن دی.
هغه زیاته کړه، چې د ټاپ پروژې د لار نقشې جوړونه د افغانستان اسلامي امارت له لوري تر څېړنې او بیاکتنې لاندې نیول شوې او د رهبري مقام له لوري تر تائید وروسته به د لاسلیکولو لپاره چمتو شي.
په ورته مهال، د ټاپ نړیوالې پروژې رئيس ښاغلي مراد آرتیکوف د افغانستان دولت د همکاري په ستایلو سره، د پروژې د پلي کولو په برخه کې د درې واړو هېوادونو( ترکمنستان، افغانستان او پاکستان) د همغږي او چمتووالي په هکله خبر ورکړ او د لومړنیو عملي اقداماتو د چمتوکولو د بهیر پر چټکتیا باندې ټينګار وکړ.
د یادونې وړده، چې د ټاپ برېښنا لېږد نړیواله پروژه په سیمه کې یو له سترو او ستراتېژیکو طرحو څخه ګڼل کېږي، چې موخه یې له ترکمنستان څخه د افغانستان له لارې پاکستان ته د برېښنا انرژي لېږد ده.
دغه پروژه د غړو هېوادونو لپاره د ډاډمنې او ارزانې انرژي د چمتوکولو برسېره، د اقتصادي پراختیا لپاره د زمینې چمتوکولو، د کارموندنې فرصتونو رامنځته کولو، د سیمه ایزو همکاریو د پراخولو او د ښکېلو هېوادونو ترمنځ به د اقتصادي او سیاسي اړیکو د ټینګولو لامل هم شي.
