د افغانستان اسلامي امارت د اوبو او انرژي وزیر، ښاغلي الحاج ملا عبداللطیف منصور، د روسیې د انرژي د اونۍ په نړیوال فورم کې ګډون وکړ
یاد نړیوال فورم چې د نړۍ له بېلابېلو هیوادونو څخه د لوړپوړو دولتي چارواکو، پانګوالو او د انرژي د سکتور د متخصصینو په حضور کې ترسره شو، د انرژي په برخه کې د همکارۍ، پانګونې، نوښتونو او د نوې ټکنالوژي د تبادلې لپاره یو مهم نړیوال فرصت بلل کېږي.
الحاج ملا عبداللطیف منصور د افغانستان اسلامي امارت د استازي په توګه د اوبو او انرژي وزارت د کړنو، لاسته راوړنو او د راتلونکو همکاریو په اړه ارزښتناک بحثونه وکړل، او د ګډونوالو پام یې د افغانستان د انرژي پراخو ظرفیتونو او فرصتونو ته راواړاوه.
د دې ګډون موخه دا وه چې د افغانستان د انرژي او اوبو په برخه کې د نړیوالو همکاریو زمینه لا پراخه شي، د بهرنیو پانګوالو باور ترلاسه شي، او د هېواد د اقتصادي ودې لپاره عملي لارې چارې رامنځته شي.
