د ارغندۍ ۵۰۰ کیلو ولټ سب سټیشن پروژې چارې ۶۰ سلنه پرمخ تللې دي
دغه پروژه د اوبو او انرژي وزارت له مهمو پروژو څخه یوه پروژه ده، چې چارې یې د عوفي بهرام خصوصي شرکت په پانګونې سره روانې دي.
اوسمهال د دغه سب سټیشن چارې په بېلابېلو برخو کې په ښه توګه روانې دي او په ټوله کې ویلای شو چې د نوموړې پروژې چارې تر اوسه پورې څه باندې ۶۰ سلنه پرمخ تللې دي.
د قراردادي شرکت یو تن انجنیر امان الله حبیبي د دغې پروژې چارې وستایلې او ډاډ ورکوي، چې د دغې پروژې چارې په غوره کیفیت سره پرمخ وړل کېږي.
په ورته مهال د اوبو او انرژي وزارت د کیفیت د کنټرول یو تن انجنیر صفي الله چې د پروژې د څارنې مسؤل دی وایي، د پروژې چارې له پلان سره سم د سب سټیشن په بېلابېلو برخو کې روانې دي.
د یادونې وړ ده، چې د دغه سب سټیشن او د ۵۰۰ کیلو ولټ مزي نورو اړوند پروژو د چارو تر بشپړېدو وروسته، له ترکمنستان څخه افغانستان ته د ۱۰۰۰ میګاواټه برېښنا جذب او وېش ته زمینه چمتو کېږي او د کابل او ۱۱ ګاونډو ولایتونو د اړتیا وړ برېښنا به تامین شي.
