بنسټیزو پروژو کې د کېندل شوو سیمو څخه د اغېزمنې ګټې اخیستنې په موخه ناسته ترسره شوه
دغه ناسته د میدان وردګ د اوبو او انرژي رئيس محترم مولوي عبدالصمد حلیم تر مشري لاندې د دغه ولایت د ټولګټو چارو ریاست د استازي او د ولایت مقام د بیارغونې او پرمختیایي چارو کارپوه او د کابل ولایت له کمپنۍ پله څخه تر غزني پورې د دوهم لین سړک د جوړولو د قراردادي شرکتونو د استازو په شتون کې ترسره شوه.
ښاغلي حلیم په دغه ناسته کې وروستیو اقلیمي بدلونونو ته په اشارې سره وویل چې د اوبو کچه ورځ تر بلې کښته ځي او اړینه ده، چې د سیلابونو د اوبو د کنټرول او د ځمکې لاندې اوبو د کچې د ټیټېدو د مخنیوي په موخه بېړني تدابیر تر لاس لاندې ونیول شي. هغه زیاته کړه، چې د سړک جوړولو لپاره باید سیمې په داسې شکل و کېندو چې د سیلاب د اوبو لپاره د کوچني بند شکل ځانته غوره او چاپيریالي ستونزې رامنځته نهکړي.
په ورته مهال، د نوموړي سړک د قراردادي شرکتونو استازو ژمنه وکړه، چې د سړک جوړولو پر مهال به هغه ټول موارد په پام کې ونیسي چې د اوبو د مدیریت په برخه کې اغېزمن رول لوبوي.
د یادونې وړ ده، چې دغه ناسته د چارو ادارې د عمومي ریاست له لوري ( په بنسټیزو پروژو کې د کېندل شوو سیمو څخه د اغېزمنې ګټې اخیستنې) د چمتو شوي لارښود پر بنسټ ترسره شوه.
