ننګرهار ولایت کې د یوه استنادي دېوال د جوړېدو چارې د څه باندې دوه سوه او درې اویا زره ډالرو په لګښت پيل شوې
د ننګرهار ولایت د لومړۍ ناحیې اړوند د یوه استنادي دېوال د جوړېدو چارې د ۲۷۳ زره او ۸۳۴ آمریکایي ډالرو په ارزښت د ننګرهار مرستیال والي محترم مولوي سعید احمد بنوري، د یو این هبیاتات استازي محترم عبدالحق تحریک، د ننګرهار سیندیزې حوزې رئيس محترم سید فضل احمد پاچا او یو شمېر نورو سیمه ییزو مسؤلینو په شتون کې پیل شوې.
د نوموړې پروژې د چارو په پرانیست غونډه کې د ننګرهار سیندیزې حوزې رئيس څرګنده کړه، چې دغه استنادي دېوال د دغې حوزې تر څارنې لاندې جوړیږي، چې کیفیت ته به یې جدي پاملرنه وشي او همدغه راز یې له مؤسساتو څخه وغوښتل چې د سیند په یو شمېر نورو برخو کې هم د دا ډول دېوالونو په جوړولو کې ورسره همکاري وکړي.
په ورته مهال، د یو این هبیتات ادارې استازي محترم عبدالحق تحریک وویل چې دغه استنادي دېوال ۹۴۲ متره اوږدوالی لري، چې د ننګرهار سیندیزې حوزې او د جلال آباد ښاروالي تر چتر لاندې پلي کېږي او چارې به یې د څلورو میاشتو په موده کې بشپړې او ګټې اخیستنې ته وسپارل شي.
د دغې پروژې د چارو په بشپړېدو سره به د جلال آباد ښار د پنډغالو، قصبې، اتحاد مېنې، ارباپانو، بابړیانو، چشمه خانجي او یو شمېر نورې سیمې د سیند د اوبو له ګواښ څخه خوندي شي.
