میدان وردګ ولایت کې شپږ ټولګټې پروژې د څه باندې ۲۰۵ زره آمریکایي ډالرو په لګښت ګټې اخیستنې ته وسپارل شوې
د دغو پروژو ګټې ته د سپارلو مراسم نن (شبنه د ۱۴۰۴ ه ل کال د چنګاښ ۲۸) د اوبو او انرژي سرپرست وزیر محترم الحاج ملا عبداللطیف منصور، د میدان وردګ مرستیال والي محترم حافظ سید الرحمن، د دغه ولایت د اوبو او انرژي رئيس محترم مولوي عبدالصمد حلیم، علماوو، قومي مشرانو او یو شمېر نورو سیمه ایزو مسؤلینو په شتون کې ترسره شو.
د اوبو او انرژي سرپرست وزیر په دغو مراسمو کې، نوموړې پروژې د اوبو سرچینو د پیاوړتیا، د اوبو سرچینو د مدیریت او کرنې د ودې په برخه کې ارزښتناکه وبللې.
هغه زیاته کړه، چې اسلامي امارت تر اوسه پورې د هېواد او د افغانستان د خلکو په وړاندې خپل مسؤلیت په ښه توګه ترسره کړی او په هېواد کې یې اسلامي نظام، امنیت، عدالت او اقتصادي پراختیا راوړې، له همدې کبله له خلکو څخه هم تمه کیږي، چې له دغه نظام څخه رښتینی ملاتړ وکړي.
ښاغلي منصور یادونه وکړه، چې د اوبو او انرژي وزارت په میدان وردګ ولایت کې د اوبو بندونو جوړونې او برېښنا رسونې نورې پروژې هم په پام کې نیولې چې انشاء الله په راتلونکي کې به یې د دغه ولایت اوسېدونکې د پرانیستې شاهدان و اوسي.
په ورته مهال، د میدان وردګ مرستیال والي په دغه برنامه کې په میدان وردګ ولایت کې د اوبو سرچینو د کموالي د یادونې ترڅنګ، د دغو پروژو اهمیت حیاتي وباله.
له بلې خوا، د میدان وردګ د اوبو او انرژي رئيس د پروژو په هکله معلومات وړاندې کړل او د دغو پروژو پلي کول یې د اوبو د مدیریت او د کرنې د ودې په برخه کې اړین وبلل.
د یادونې وړ ده، چې دغه پروژې د ملګرو ملتونو د خوړو او کرنې سازمان (ایف،اې، او) په مالي تمویل سره د اوبو او انرژي وزارت تر څارنې لاندې پلي شوې، چې پکې د میدان وردګ ولایت په نرخ ولسوالي کې درې چکډمونه، یو ذخیروي حوض او د اوبولګولو یو کانال او په جغتو ولسوالي کې د شیخ علي کانال جوړونه شامله ده.
د دغو پروژو په پلي کولو سره د اوبو د مدیریت، د ځمکې لاندې اوبو د پیاوړتیا او کرنیزو ځمکو د خړوبولو په برخه کې یو مثبت ګام اخیستل شوی، چې سلګونه کورنۍ ورڅخه ګټه پورته کوي.
