د WFP سازمان سره د همغږۍ ناسته تر سره شوه.
د اوبو چارو د تنظیم ملي ادارې تخنیکي مرستیال انجنیر احمد ویس بصیري په خپل کاري دفتر کې د خوړو نړیوال سازمان د دفتر مسؤلې مېرمن ماري ایلین سره ناسته وکړه.
په دغه ناسته کې د دواړو ادارو په ښې همغږۍ، د اوبو منابعو څخه غوره استفادې، د WFP د اوبو برخې د پلاني پروژو نوملړ د اوبو چارو د تنظیم ملي ادارې سره شریکول، د وچکالۍ پر وړاندې ګډه مبارزه او یو شمېر نورو مسائيلو باندې خبرې او ګډ بحث وشو.
په دغه ناسته کې د خوړو نړیوال سازمان (WFP) مسؤلې مېرمن ماري ایلین په افغانستان کې د اوبو مدیریت پراختیايي پروژو د تطبیق په برخه کې د اوبو چارو د تنظیم ملي ادارې د کړنو او فعالیتونو ستاینه وکړه او په دغه برخه کې یې د یاد سازمان په استازیتوب د هر ډول همکارۍ ژمنه وکړه.
هغې زیاته کړه د خوړو نړیوال سازمان د اوبو په برخه کې هم فعالیت کوي چې په دغه برخه کې یې څو پروژې تطبیق کړي.
د اوبو چارو د تنظیم ملي ادارې تخنیکي مرستیال ښاغلي انجنیر احمد ویس بصیري د WFP له همکاریو مننه وکړه او زیاته یې کړه د اوبو مدیریت نوي قانون ته په کتو د افغانستان د اوبو مدیریت بشپړ مسؤلیت د اوبو چارو د تنظیم ملي ادارې په غاړه دی او په دغه برخه کې د خوړو سازمان د مرستو او همکارۍ هرکلی کوي.
ښاغلي بصیري زیاته کړه د اوبو چارو د تنظیم ملي اداره کولی شي د نورو هېوادونو په څېر د اوبو په برخه کې د WFP له مرستو څخه غوره استفاده وکړي او د دې تر څنګ به په نږدې راتلوونکي کې د اوبو چارو د تنظیم ملي ادارې او د خوړو نړیوال سازمان (WFP) تر منځ د ګډې همکارۍ هوکړه لیک لاسلیک شي.
د اوبو چارو د تنظیم ملي اداره
