د کاپیسا ولایت د باغدرې برېښنا بند ته د لاسرسي په موخه د سړک جوړولو پروژې چارې پیل شوې
د باغدرې برېښنا بند کیڼ لوري ته د لاسرسي په موخه د ۸ کیلومتره سړک جوړوېدو چارې د کاپیسا والي محترم قاري احسانالله بریال، د کاپیسا ولایت د اوبو او انرژي رئیس محترم انجنیر کاوه خروش، د ام جې اې ام شرکت د استازي محترم حکمتالله دانشیار او یو شمېر نورو سیمه ایزو مسؤلینو او قومي مشرانو په شتون کې پیل شوې.
د کاپيسا والي د دغې پروژې د پرانیستې پر مهال، د باغدرې برېښنا بند جوړول د هېواد د اقتصاد لپاره د ملي پانګو څخه یوه وبلله او قراردادي شرکت ته یې ډاډ ورکړ، چې سیمه ایزه اداره په دې برخه کې همکاري ته چمتو ده.
دغه سړک د باغدرې برېښنا بند ته د سروې تجهیزاتو د لېږد په موخه جوړیږي، چې چارې به یې د ۴۵ ورځو په موده کې بشپړې شي.
د یادونې وړ ده، چې د باغدرې برېښنا بند د جوړېدو په موخه څېړنیزې چارې د اړوندو مسؤلینو له لوري په چټکۍ سره روانې دي.
