د هرات د ولایتي انرژي کمېټې په ناسته کې په صنعتي ښارګوټي کې د لمریزې برېښنا انرژۍ د تولید په هکله خبرې، اترې وشوې
دغه ناسته د هرات د والي محترم الحاج شیخ نوراحمد اسلام جار، د هریرود- مرغاب عمومي سیندیزې حوزې او د هرات د ولایتي انرژي د کمېټې د رئيس محترم مولوي سید عبدالسلام مستوفي آغا، د لویدیځ زون د انرژي چارو د تنظیم آمر محترم ملا سید محسن آغا او یو شمېر نورو اړوندو ادارو د استازو په شتون کې د ولایت مقام د غونډو په تالار کې ترسره شوه.
په دغه ناسته کې، په صنعتي ښارګوټي او د مارکیټونو پر بامونو باندې د لمریزې برېښنا د تولید او د دوو اړخیزو میټرونو د نصبولو په هکله بحث او د اندونو تبادله وشوه.
په ورته مهال، د هرات والي په دغه ناسته کې په هرات ولایت کې د انرژي د تولید د ارزښت په هکله خبرې وکړې او زیاته یې کړه، چې په دې برخه کې هر راز همکاري ته چمتو دی.
همدارنګه په دغه ناسته کې، د هریرود- مرغاب سیندیزې عمومي حوزې او د هرات د ولایتي انرژي د کمېټې رئيس محترم مولوي سید عبدالسلام مستوفي آغا پانګونې ته د پانګوالو د هڅولو ترڅنګ زیاته کړه، چې د تخنیکي او مالي چارو د عملي اقدام په موخه دې خپل پروپوزلونه چمتو کړي؛ ترڅو د اوبو او انرژي له وزارت سره شریک شي.
له بلې خوا، د هرات ولایت د کانونو او صنایعو خونې هم د پانګونې لپاره خپل چمتووالي څرګند کړ.
