د اوبو او انرژي سرپرست وزیر د عوفي بهرام شرکت له مسؤلینو او د هغه له بهرنیو شریکانو سره د اوبو او انرژي په پروژو کې د پانګونې په هکله بحث او د اندونو تبادله وکړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د عوفي بهرام شرکت له مسؤلینو او د هغه له بهرنیو شریکانو د یمن، ترکیې او ندونیزیا هېوادونو له اوسېدونکو سره لیدنه وکړه او د اوبو او انرژي په پروژو کې د پانګونې په هکله یې خبرې وکړې.
په دغه لیدنه کې، د اوبو او انرژي سرپرست وزیر یادونه وکړه، چې له نیکه مرغه په افغانستان کې له کلونو جګړو او ستونزو وروسته، اوسمهال د هېواد په ټولو برخو کې یو اسلامي شرعي نظام حاکم شوی او د افغانستان د آبادي او پراختیا په موخه د پانګونې لپاره له هره پلوه زمینه چمتو شوې ده. هغه دغو پانګوالو ته ډاډ ورکړ، چې په اوسنیو شرایطو کې د پانګوالو مال او ځان خوندي دی او په دغه هېواد کې د پانګونې لپاره اړینې وړتیاوې شتون لري.
په ورته مهال، د نوموړو شرکتونو مسؤلینو هم په افغانستان کې د بېلابېلو سرچینو څخه د انرژي د تولید او د اوبو رسولو د پروژو په برخه کې پانګونې ته د لېوالتیا په څرګندولو سره ژمنه وکړه چې د افغاني انجنیرانو د تخنیکي زده کړو په برخه کې به هم له دغه وزارت سره همکاري وکړي.
