د اوبو او انرژي سرپرست وزیر د بخش آباد بند پروژې د چارو پر چټکتیا باندې ټینګار وکړ
د اوبو او انرژي سرپرست وزیر محترم الحاج ملا عبداللطیف منصور او ددغه وزارت د اوبو معین محترم مجیب الرحمن عمر آخندزاده د بخش آباد بند د قراردادي شرکت له مسئولینو سره د همغږي په یوه ناسته کې د بخش آباد بند د انحرافي تونلونو پروژې د پرمختګ وضعیت وارزول او د هغې د چارو پر چټکتیا باندې یې ټینګار وکړ.
د ناستې په بهیر کې د وزارت تخنیکي مسئولینو او د قراردادي شرکت مسئولینو د نوموړې پروژې د چارو د پرمختګ په هکله معلومات وړاندې کړل او یادونه یې وکړه، چې د تونلونو د کیندنې او پاک کاري چارې بشپړې شوې او کانګریټ اچولو ته چمتو دي.
همدارنګه د یادونې وړ ده، چې په دغه ناسته کې د چارو د چټکتیا او د تونلونو د کانګریټ اچولو چارو د پیل په موخه د لازیاتو همغږیو رامنځته کولو په هکله اړینې پریکړې وشوې.
