د اوبو او انرژي سرپرست وزیر د ازبکستان هېواد د اوبو له وزیر سره وکتل
د افغانستان د اسلامي امارت د اوبو او انرژي سرپرست وزیر محترم الحاج ملا عبداللطیف منصور ازبکستان هېواد ته د خپل سفر په بهیر کې د دغه هېواد د اوبو له وزیر محترم شوکت خمرایف سره وکتل او د آمو سیند څنډو د ټینګښت او د اوبو د مدیریت په هکله خبرې اترې وکړې.
په دغه لیدنه کې، دواړو لورو د دواړو هېوادونو ترمنځ د طبیعي سرچینو د ګډې کارونې او د ساحوي همغږي په هکله هم بحث او د اندونو تبادله وکړه.
همدارنګه، په دغه لیدنه کې دواړو لورو ژمنه وکړه، چې د اوبو په برخه کې به خپلو تخنیکي ټیمونو ته د همکاري زمینه چمتو کړي؛ ترڅو دواړه هېوادونه د اوبو له زېرمو څخه سمه او اغېزمنه ګټه پورته کړي.
د یادونې وړ ده، چې تېره ورځ هم د اوبو او انرژي سرپرست وزیر ازبکستان هېواد ته د خپل سفر په ترڅ کې د دغه هېواد د انرژي له وزیر سره وکتل او د علاقې وړ موضوعاتو باندې یې خبرې او د اندونو تبادله وکړه.
