پکتیا ولایت کې د دوو تحکیماتي دېوالونو د جوړېدو چارې د څه باندې ۱۸ میلیونه افغانیو په لګښت پیل شوې
پکتیا ولایت کې د جلګې خوړ څنډو د ټینګښت په موخه د بر کوچي خېلو استنادي دېوال او د نورالدین بابا کلا د ګبیوني دېوال د جوړېدو چارې د ۱۸ میلیونه، ۸۷ زره او ۱۰۲ افغانیو په لګښت د پکتیا سیندیزې فرعي حوزې رئيس محترم ملا محمد اسماعیل آخندزاده، د ولایت مقام د دفتر رئيس محترم مولوي نورالله ممتاز، د پکتیا سیندیزې فرعي حوزې سلاکار محترم انجنیر فضل الرحیم رحیمي، یو شمېر نورو سیمهایزو مسؤلینو، قومي مشرانو او د سیمې د خلکو په شتون کې پیل شوې.
د برکوچي خېلو استنادي دېوال د ۲۷۷ متره په اوږدوالي سره جوړیږي، چې چارې به یې د ۴ میاشتو په موده کې بشپړې او د نورالدین بابا کلا د ګبیوني دېوال د ۴۶۴ متره په اوږدوالي سره جوړیږي، چې چارې به یې د ۳ میاشتو په موده کې بشپړې او ګټې اخیستنې ته وسپارل شي.
دغه پروژې د جلګې خوړ څنډو د ټینګښت، د سېلاب له ګواښ او ویجاړیو څخه د کرنیزو ځمکو او استوګنیزو کورونو د ساتنې او د سېلابي اوبو د لوري د منظموالي په موخه پلي کېږي.
په نوموړو پروژو کې د سیمې اوسېدونکو ګڼ شمېر کسانو ته د کار زمینه چمتو شوې، چارې یې د اوبو او انرژي وزارت له پراختیایي بودجې څخه د پکتیا سیندیزې فرعي حوزې ریاست تر څارنې لاندې پرمخ وړل کېږي.
