د کجکي بند له پروژې څخه لیدنه

د اوبو او انرژی وزارت د اوبو مرستیال ښاغلي انجنیر خان محمد "تکل" له خپل ملګري پلاوي سره په هلمند ولایت کې د کجکي بند پروژې څخه د کتنې او ارزونې په موخه دوه ورځنی سفر در لود چې پرون (لیندۍ ۷مه ۱۳۹۸) پيل او نن پای ته ورسید.
په دغه سفر کې ښاغلي "تکل" لومړی د ۷۷ ترکۍ کمپنۍ له چارواکو سره غونډه وکړه او د کجکي بند د دویم پړاو (Phase 2) د ودانیزو، تخنیکي او د پروژې د پرمختګ په اړه په تفصیلي توګه خبرې وکړې.
د دقیقې ارزونې او کتنې په موخه، ښاغلي "تکل" او ور سره ملګري پلاوي، د پروژې له زاړه پاور هوس، د نوي پاور هوس د جوړوړو له کارونو، له شته درې توربینونو، تونلونو، جنراتورونو، د بند د اوبو له پارچاوې، د بند له دیوال، د اوبو له کاسې، د برښنا د تولید له وسایلو او نورو اړوندو چارو څخه په کره توګه لیدنه او ارزونه تر سره کړه.
سربیره پر دې، ښاغلي "تکل" په یاده پروژه کې د اوبو او انرژی او د برښنا شرکت له موظفو مسئولینو سره وکتل او له هغوی څخه یې د اوبو او د برښنا په برخه کې هر اړخیز معلومات واوریدل. د وزارت اړوند موظفینو، د یوشمیر وسایلو د خرابیدو په خاطر، د هغو د جوړیدو او نوي کیدو وړاندیز وکړ او ښاغلي "تکل" یې اړوندو مسئولینو ته د جوړیدو او ترمیم هدایت ورکړ.
همداشان، ښاغلي انجنیر خان محمد "تکل" او ورسره پلاوي، د کجکي ولسوالی له ښاغلي ولسوال (حاجي عبدالرازق مظلومیار)، د اردو د کنډک له قومندان، د پولیسو له قومندان، د عامه ساتنې د تصدی له قومندان او یوشمیر نورو اړوندو ملکی او نظامي چارواکو سره غونډه وکړه او د غونډې په ترڅ کې یې، له هغوی څخه د ښه امنیت د تأمینولو لپاره مننه وکړه. په دې ناسته کې، ښاغلي "تکل" له ښاغلي ولسوال څخه د زمین داور کانال او په موسی کلا ولسوالی کې د تطبیق کیدونکې پروژې په تطبیق کې مرسته وغوښته او ویې ویل چې د ولسي ملاتړ په برخه کې، ستاسو نقش ټاکونکی دی.
په دې مجلس کې، د هغو ځمکو د استملاک په اړه هم خبرې وشوې چې د کجکي بند د دویم پړاو په تطبیق سره، د اوبو لاندې کیږي. په دې اړه د اوبو او انرژی وزارت ستر حقوقي سلاکار، ښاغلي نصرت الله حقپال حاضرینو ته د نافذه قوانیونو په رڼا کې معلومات ورکړل او وې ویل چې زیانمنو ته به په بشپړ ډول، جبران خساره ورکول کیږي.
دغه سفر، د پروژې له هر اړخیزې کتنې او ارزونې وروسته، نن پای ته ورسید